1Sa 22 | ZomZIV | STEP | David in Gath nusia a, Adullam suanghawm ah a suakta hi. A sanggamte le a pa innkuanpihte in ama thu a zak uh ciangin a kiangah a paisuk uh hi.

1 Samuel 22

Adullam le Mizpah ah David

1 David in Gath nusia a, Adullam suanghawm ah a suakta hi. A sanggamte le a pa innkuanpihte in ama thu a zak uh ciangin a kiangah a paisuk uh hi. 2 A lungdongte ahi a, leiba bate ahi zongin lungkimlohna a nei khempeuh a ma kiangah kikhawm uh a, amah makai a suak hi. Amah tawh mi zali bang a om uh hi. ^a

3 Tua lai panin Moab a Mizpah ah David pai-a Moab kumpipa kiangah, “Pasian in kei ading hong sepsak ding ka theih matengin ka nu le ka pa hong pai-in no tawh nong tengkhawmsak zo ding hiam?” a ci hi. 4 Tua ciangin amaute Moab kumpipa kiangah nusia-a, suang-hawm sungah David a om laisiah amaute tawh a omkhawm uh hi.

5 Ahi hangin kamsangpa Gad in David kiangah, “Suanghawm sung ah teng kei in; Judah gam ah pai in,” a ci hi. Tua ciangin David paikhia a, Hereth tulakah a pai hi. ^b

Saul in Nob Siampite That

6 Saul in David le a mite a omna a kitheih lam a za hi. Tuateh a khuta teipi tawisa-in Gibeah mualtung a makeng kung nuai-ah Saul tu-a a kimkotah a uliante khempeuh a ding uh hi. 7 Saul in amaute kiangah, “Benjamin mite aw, ngai un! Jesse tapa in na lote uh le na lenggui lote uh hong pia ding ahi hiam? 8 Bang hangin note khempeuh in hong sawmsim na hi uh hiam? Ka tapa in Jesse’ tapa tawh thukhun a bawl lai-in kuamah in nong gen kei uh hi. Note khat beek in kei nong thudon kei uh a, ka tapa in tuni donga a hih bangin ka nasempa kei buksim dingin a sawl lai-in kuamah in nong gen kei uh hi,” a ci hi. ^c

9 Ahi hangin Saul uliante tawh a ding khawm Edom-te Doeg in, “Nob-a Ahitub’ tapa Ahimelech kiangah Jesse’ tapa a pai lam ka mu hi. 10 Ahimelech in ama adingin TOPA thu dotsak a, lam-an le Philistia-pa Goliath’ namsau a pia hi,” a ci hi. ^d

11 Tua ciangin kumpipa in Ahitub’ tapa siampi Ahimelech le Nob a siampi sem a pa’ innkuanpih buppi samsak a, amaute kumpipa kiangah a pai uh hi. 12 Saul in, “Ahitub’ tapa aw, na ngai in,” a ci hi.

Amah in, “Ka ngai hi, ka topa aw,” ci-in a dawng hi.

13 Saul in, “Bang hangin nang le Jesse’ tapa in kei hong langpang simin tuni-in amah bangin kei hong lehdoin hong pansim nading anlum le namsau pia in, ama ading Pasian tungah thu dotsak na hi hiam?” a ci hi.

14 Ahimelech in kumpipa kiangah, “Na nasemte khempeuh lakah kumpipa makpa, nang hong cingte ukpa David sanga kizahtakzaw no innkuan sungah amah banga muanhuai kua om ahi hiam? 15 Ama adingin Pasian thu ka dotsak tua ni a masa pen ahi hiam? Hi kei! Na nasempa in hih thupiang buppi thei kha lo ahi manin kumpipa in na nasempa ahi-a, a pa innkuante ahi zongin mawhsak kei in,” ci-in a dawng hi.

16 Ahi hangin kumpipa in, “Ahimelech aw, nang le na pa innkuan bup na si taktak ding uh hi,” a ci hi.

17 Tua ciangin kumpipa in a kianga om amah cingte thu pia a; “Amaute in zong David pawlpih uh ahi manin kihei unla TOPA siampite that un. Amah a taisim hi napi amaute in kei hong ko kei uh hi,” a ci hi.

Ahi hangin kumpipa uliante in TOPA siampite sat dingin a khut uh a liik nuam kei uh hi.

18 Tua ciangin kumpipa in Doeg kiangah, “Nang kihei inla siampite satlum in,” ci-in thu a pia hi. Tua ahi ciangin Edom-pa Doeg kihei a amaute a satlum hi. Tua ni-in siampi puanpak silh sawmgiat le nga a that hi. 19 Amah in tua siampite khua Nod a om numei, pasal, naupang, naungeek le a bawng, a laa, a tuu-te dongun namsau in a that hi. ^e

20 Ahi hangin Ahitub’ tapa, Ahimelech tapa Abiathar suakta a, David pawl dingin a tai hi. ^f 21 Amah in TOPA siampite Saul in a thah lam David a ko hi. 22 Tua ciangin David in Abiathar kiangah, “Tua ni-a Edom-te Doeg a om ciangin Saul tungah ko mah inteh, ka cih hi. Na pa innkuan bup sihna kei hang ahi hi. 23 Kei kiangah om in; lau kei in; nang thah dinga hong zongte kei hong zongte mah ahi hi. Kei tawh na bitkhawm ding hi,” a ci hi.